Kommentar til artikkel

Mot mediedysleksiens tidsalder? av Soilikki Vettenranta

De unge, som må skape sin identitet i krysspresset mellom den stadig endrede mediekulturen og den galopperende nye medieteknologien, trenger mer enn verktøy. De trenger tid til refleksjon, stabilitet og mulighet til å lære empati og ansvar. (Vettenranta, 2007 s.13)

Med dette sitatet peikar Vettenranta på ein vesentleg ting som er svært viktig å hugse på med den teknologiske utviklinga vi har i dag. Med digitale verktøy inn i alle fag er det lett å tenkje at det vil vere om å gjere å introdusere elevane for så mange verktøy som mogleg. Elevane vil kunne jobbe meir effektivt med dei nye verktøya, men vil det seie at også læringa blir meir effektiv?

I den mediegale kvardagen vi lever i, med informasjon som strøymer mot oss frå alle kantar, er det viktig både for born og vaksne at vi tek oss tid til å puste litt, og at vi ikkje gløymer den mellommenneskelege kontakten. Eg merkar godt på meg sjølv at eg ikkje heilt skjønar alvoret i dei katastrofemeldingane eg ser på TV. Det har etter kvart blitt så mange av dei, og ingen har råka meg direkte, og difor tenkjer eg ikkje så mykje over det lenger. Det er med andre ord ikkje gjennom media eg har lært meg empati og ansvar, men gjennom god, gammaldags samhandling med andre menneske.

Med dette sagt, så meiner eg også heilt klart at vi har godt av den informasjonsstraumen som kjem inn over oss. Vi treng å få vite korleis folk i andre delar av verda har det, og vi har godt av å sjå vår eigen situasjon i lys av korleis andre har det. Vi greier ikkje å bli empatiske, ansvarlege menneske dersom vi ikkje veit noko om det som skjer utanfor vår eigen stovevegg.

Korleis har så DKL-studiet vore i høve til det innleiande sitatet? Vi har iallfall merka galoppen. Og vi har merka at utviklinga går i ei rivande fart. Tid til å stoppe opp og tenkje har det ikkje alltid blitt så mykje av, men så har vi også gjort mykje godt arbeid, og lært utruleg mykje på vegen.

Geotagging i Picasa

Ja, då var nettalbum og bildeframsyning på plass!

Med Picasa 3 og nettalbumet gjekk denne jobben som ein draum! I Picasa 3 har ein full oversikt over alle bileta på datamaskinen, og ein kan ganske enkelt berre merke dei bileta ein vil laste opp til nettalbumet, og trykke 'Last opp'.

Når bileta så var på plass på nettet, kunne eg så ganske enkelt plassere kvart bilete på eit kart. TIPS: Karta i Picasa er ikkje heilt nøyaktige, så dersom du skal plassere bileta på til dømes Google Earth seinare, kan det lønne seg å bruke satelittvisninga når du plasserer markøren.

Eg plasserte bileta i Google Earth ved å trykke 'Vis i Google Earth' nederst til høgre i albumvisninga på internett. Det vart sjåande slik ut.

Til slutt "laga" eg biletframsyninga som står nederst i dette innlegget. Då trykte eg ganske enkelt på 'Kobling til dette albumet' > 'Embed Slideshow', kopierte så HTML-koden, og limte den inn i HTML-redigeringa på bloggen.

Bridge Construction Set

Dette spelet prøvde vi på andre samling i DKL102. Eg har ingen problem med å sjå for meg at elevane kan ha nytte av dette, men samtidig ser eg at alle nok ikkje vil ha like stort utbyte av å spele dette spelet. Det finst iallfall to måtar å spele spelet på: Tilfeldig prøving og feiling, og systematisk utprøving av logiske hypotesar.

Dei som spelar etter den siste metoden vil etter mi meining sitje att med ganske mykje lærdom. Dei ser blant anna korleis trekantane støttar opp konstruksjonen, og dei kan lære balansen mellom det å nytte det billegaste materialet, og å bruke eit materiale som er litt dyrare, men kanskje vil halde mykje lenger.

I Level 3 fann eg ut at dersom eg nytta stål i staden for jern i bjelkane på toppen, ville brua bli litt dyrare. Eg valde å gjere dette likevel, sidan presset på bjelkane då vart mindre (trykk 'Stress' i simulation-modus - grøne bjelkar er positivt), og kanskje ville då brua vare lenger... Slik såg det ut til slutt:


Og slik fungerte testen:

Comic Life

Comic Life er eit program eg ser for meg kan vere svært aktuelt å nytte i klasserommet. Samansette tekstar spelar ei stor rolle i Kunnskapsløftet, og inngår som eigen kategori i kompetansemåla i norsk etter alle årstrinn. Sidan norsk er eit fag som gjennomsyrer alle andre fag i skulen, kan ein ta med seg desse kompetansemåla og kombinere dei med kompetansemål i praktisk talt alle fag i skulen. Døme på kompetansemål som aktualiserer bruk av Comic Life, er:

Læreplan i Norsk

Etter 2. årstrinn:

• arbeide kreativt med tegning og skriving i forbindelse med lesing
• uttrykke egne tekstopplevelser gjennom ord, tegninger, bilder, musikk og bevegelser

Etter 4. årstrinn:

• lage fortellinger ved å kombinere ord, lyd og bilde

Etter 7. årstrinn:

• lage sammensatte tekster med bilder, utsmykninger og varierte skrifttyper til en større helhet, manuelt og ved hjelp av digitale verktøy

Etter 10. årstrinn:

• bruke ulike medier, kilder og estetiske uttrykk i egne norskfaglige og tverrfaglige tekster

I dette eksempelet har eg kombinert kompetansemåla ovanfor med temaet mobbing, som er naturleg å ta opp i til dømes RLE:

Kjelde:

http://udir.no/grep/Lareplan/?laereplanid=710976

Hensyn

Dette emnet hadde vi også ein gjennomgang av i DKL101, men sidan dette studiet skal handle mykje om publisering av medieproduksjonar, var det veldig greitt med ein repetisjon.

Det er mykje ein må ta hensyn til når ein skal publisere både bilete, lyd, video og anna materiale, og svært mange bryt lova kvar einaste dag utan å vite om det. To ting som kan vere greitt å skaffe seg oversikt over med ein gong, er:

1. Kven har opphavsretten til materialet?
2. Kven er med på produksjonen?

Har ein desse tinga på plass, kan arbeidet starte med å skaffe seg dei rettigheitene som skal til for å ha lov til å publisere materialet. Kanskje litt i overkant å kalle eit bilete for ein produksjon, men likevel. Vil ein publisere eit slikt, må ein skaffe seg løyve både frå personen som har tatt biletet, og personane (evt. føresette under 15 år) som er med på biletet. Publisering av musikk og video kan fort bli eit meir krevjande arbeid. Her er det fort mange fleire personar som er involverte, alle med opphavsretten til sin del av produksjonen. Å skaffe seg rettigheitene til publisering av slike produksjonar, kan fort bli eit kostbart og tidkrevjande arbeid.

Hensyn til opphavsrett er eit vanskeleg fagfelt, og både i skulen og elles i samfunnet har det blitt synda mykje mot dette. Eg er blant anna ikkje sikker på om eg hadde mitt på det reine då eg la ut følgjande klipp på youtube.

Design

Designemnet har eg ikkje lagt så voldsomt mykje arbeid i, men eg har i det minste brukt same headeren i nettavis, blogg og arbeidsmappe. Motivet i headeren er min kjære mops, Oliver, og dette gir desse sidene eit personleg preg. Han er prikk lik far sin, for å seie det slik..:-)

Fargane på blogg og nettstad har eg prøvd å tilpasse headeren. Om eg har klart det, kan sikkert diskuterast, og det som iallfall er sikkert, er at eg har valgt fargar som høver dårleg for svaksynte. Mitt utgangspunkt er at dei som skal sjå på sidene mine har eit rimeleg godt syn..;-) Samtidig finst det heilt sikkert også finare fargar enn spygrønt og lysebrunt, eit hensyn eg også har valgt å sjå vekk frå.

Elles trur eg at val av skrifttype og -størrelse skal vere greitt, og særleg på nettstaden har eg valt å forstørre skrifta litt, slik at Kjell skal sleppe å verte sliten i hovudet sitt... I arbeidsmappa ligg skjermkutt frå alle tre sidene, men eg kan også lenkje til dei her: Nettstad, Blogg og Nettavis.

Arbeid med M3

Utgangspunktet for denne oppgåva, var å lage eit informasjonsnav som skulle vere med på å auke elevane sin informasjonskompetane.

Slik eg forstod det, skulle det nemnde informasjonsnavet gjere slik at elevane skulle sleppe å søkje etter informasjon på Google, og på den måten finne relevant og påliteleg informasjon meir effektivt. På denne måten skulle elevane lære seg betre søkjestrategiar, og informasjonen skulle kome til dei via RSS-feeds. Eit paradoks er det då at eg som lærar måtte bruke nettopp Google for å finne dei aktuelle RSS-kjeldene, slik at det heile då uansett er basert på Googlesøk... Og kven veit om eg er god nok på kjeldekritikk?

Spørsmåla eg sit att med etter å ha levert inn denne oppgåva, er mange. Har eg i det heile svara på oppgåva? Er informasjonsnavet mitt verkeleg eit informasjonsnav slik det er tenkt i denne samanhengen? Vil elevane oppnå auka informasjonskompetanse ved å sleppe å leite etter informasjonskjelder sjølve, eller gjer vi dei eigentleg ei stor bjørneteneste? Eg er i det heile tatt svært spent på tilbakemeldinga til denne oppgåva...

Eg kan i alle høve legge ut eit skjermkutt av navet mitt, slik det ser ut til denne oppgåva:

Tala er forklarde i oppgåva, og sidan dette berre er ein illustrasjon, tek eg ikkje med dette her.

Arbeid med M2

Dette var den einaste gruppeoppgåva i DKL102, noko som kanskje var greitt, sidan det aldri kan bli lett å få til eit gruppearbeid med så mange som 6 medlemmer på gruppa. No seier ikkje eg at vi hadde særlege problem med dette, men dess fleire ein er på gruppa, dess mindre får kvart medlem bidra med og ikkje minst gjennomslag for. Ein gruppestørrelse på 3-4 hadde vore meir passeleg, men kanskje hadde vi då fått oppleve dei same forseinkingane vi fekk i haust med tanke på respons på oppgåvene...?

Gruppa møttest fleire gonger på "gamlemåten", både på Berte Kanutte og på Samfunnshuset, og på den måten greidde vi å sikre framdrifta i arbeidet. Skrivinga gjekk føre seg over Google Dokumenter, noko som fungerte greitt. Vi hadde til ei viss grad fordelt arbeidet mellom oss, og det var sjeldant at to var inne og skreiv samtidig. Dermed unngjekk vi kjende konflikter som kan oppstå, med lagring av dokumentet og anna smårusk.

Ein føresetnad for å levere inn ei god oppgåve der 6 ulike individ har bidrege med skrivinga, er at ein eller to tek på seg ansvaret for å gå over oppgåva til slutt, for å sikre eit så heilskapeleg produkt som mogleg. Dette gjorde vi, og Ingunn og meg sjølv gjekk over oppgåva til slutt med tanke på språk og kildetilvisingar.

Samarbeidet med oppgåva må ha fungert godt, iallfall dersom ein skal dømme etter tilbakemeldingane. Det var alt i alt ein interessant og lærerik prosess, der vi fekk tenkt nøye gjennom bruken av samansette tekstar i skulen.

Nettavis som arbeidsmåte

Klasseavis og liknande er ein frå før mykje brukt arbeidsmåte ute i skulen, iallfall slik eg hugsar det frå mi eiga skuletid. Med stadig nye og betre nettressursar på dette området, vert det etter mi meining stadig meir aktuelt å nytte denne arbeidsmåten i stadig fleire samanhengar.

No er det ikkje lenger berre snakk om å klippe og lime saman eit produkt som skal henge på klasseromsveggen i eit gitt tidsrom. No kan ein publisere desse produkta på internett slik at også andre kan få nytte av dei, og det vert lettare å knyte arbeidet opp mot anna arbeid i same emne. Avisene vil heller aldri hamne i papirdunken bak skulen, slik det nok har blitt gjort tidlegare. No kan ei avis ligge på internett til evig tid, slik at elevane kan ta den opp att ved ei seinare anledning. Gir ikkje dette grunnlag for ei livslang læring, så veit ikkje eg.

Ei nettavis kan lagast om kva tema det skulle vere, og det treng heller ikkje å krevje like mykje tid og ressursar som det har gjort tidlegare. Elevane kan nytte seg av ferdige malar for korleis ei avis kan sjå ut, og soleis fokusere meir av energien sin på sjølve fagstoffet.

Av desse grunnane er eg svært glad for at vi gjennom dette studiet har fått moglegheit til å teste ut avisproduksjon i praksis, slik at vi lettare veit korleis vi skal gripe dette an ute i skulen.

Arbeid med A2

Arbeidet med arbeidskravsoppgåve 2 innebar ulike arbeidsoppgåver og ulik arbeidsmengd for medlemmane i gruppa. Kvar enkelt la mykje arbeid i artiklane til sjølve nettavisa, enkelte la ned mykje arbeid i dokumentet som skulle leverast inn, andre (spesielt Linda) brukte svært mykje tid på html-redigering. Så kom arbeidet med tilbakemelding til den andre gruppa. I det heile tatt var det mykje arbeid som skulle gjerast, og kanskje var det ikkje alltid like lett å fordele arbeidet rettferdig.

Alt i alt synest eg at samarbeidet i gruppa fungerte godt. Gruppa består av ganske forskjellige individ, og vi har alle våre måtar å arbeide på. Til sjuande og sist syns eg vi drog nytte av dette, og alle fekk bidra med det dei var gode til. Samarbeidet gjekk føre seg via msn og Skype, noko som fungerer godt med god planlegging. Og sist, men ikkje minst: Sluttproduktet vart etter mi meining veldig bra! :)

Som ein slags "co-redaktør" brukte eg ein del tid på html-redigeringa, og fekk då erfare at dette ikkje er arbeid for "normale" folk. Mykje prøving og feiling, og ikkje minst mykje irritasjon inne i biletet her. Men det gjekk til slutt, og eg tek forhåpentlegvis med meg nyttige erfaringar vidare i den digitale verda. Eg fekk også bidratt med mitt til fellesdokumentet, og seier meg også nøgd med dette.

Dette var ei utfordrande oppgåve på mange måtar. Først og fremst var det mykje arbeid med det meste, og på grunn av ulike faktorar vart det vanskeleg å fordele arbeidet rettferdig. Blant anna kunne berre éin redigere html i gongen, slik at det vart vanskeleg å dele på dette arbeidet.

Graset er alltid grønare på den andre sida

Denne filmen laga eg, Elena og Helene på andre samling i DKL104. Filmen er utan lyd, men eg trur bodskapet kjem fram likevel.

Den stygge andungen

Her er animasjonsfilmen eg, Ingunn og Nerissa laga på siste smalinga i DKL102.

Vi fekk erfare at det slett ikkje var så enkelt å halde fokus på det faglege under eit slikt arbeid, fingrane klødde rett og slett for mykje etter å kome i gang med sjølve filmen. Ei nyttig erfaring å ta med seg vidare ut i skulen!

Tredje og siste samling DKL102

Denne samlinga bestod av to vidt forskjellige dagar.

Torsdagen var sett av til arbeid i responsgrupper. Her hadde Kjell sett oss saman i grupper på to og to, der vi skulle gi respons til kvarandre sine mappeoppgåver. Dette var noko eg ikkje såg særleg fram til, sidan tilbakemeldinga på M1 var så uklar som den var, og M3 hang som eit stort spørsmålstegn i lause lufta. Eg var difor ikkje heilt komfortabel med å skulle vise fram desse oppgåvene til ein medstudent. Det vart slett ikkje så gale som eg hadde frykta, og Siv-Mette gav meg mange nyttige tilbakemeldingar som vil bli flittig brukt i eventuelle omarbeidingar av desse to oppgåvene. Det viste seg at vi var usikre på mange av dei same tinga, og dette var med på å gi meg ei viss grad av sjelefred..:)

På fredag var det klart for førelesing av sjølvaste Tor Arne Wølner, der han snakka om porteføljemetodikk og digitale mapper. Kvalitative læringsmål vart lagt stor vekt på, og dette skulle vi ta med oss vidare inn i arbeidet med ein animasjonsfilm. Her skulle gruppene delast i to, men sidan både Nicholas, Helene og Grethe var fråverande på denne samlinga, vart det Ingunn, Nerissa og meg som skulle forsvare Gruppe 2 si ære. Vi skulle velje mellom eventyr eller reklamefilm, og vi valde eventyret om den stygge andungen.

Meininga var at vi først skulle setje opp læringsmål og kjenneteikn for måloppnåing, men vi starta vel kanskje litt i feil ende her. Vi hadde kjøpt inn plastelina for anledninga, og klødde nok litt for mykje i fingrane etter å kome i gong med sjølve filmen. Vi sette i gong med storyboard og figurlaging, men det vart det fort slutt på då Wølner og Antvort fann oss inne på eit grupperom. Beskjeden var klar: Læringsmål og kjenneteikn på måloppnåing først! Dette skipla oss nok litt, og det vart eit voldsomt stress for å verte ferdige med filmen. Vi rakk det ikkje heilt, og måtte halde fram etter at vi kom heim. Resultatet ligg her.

Ei av dei viktigaste erfaringane vi fekk med oss frå denne dagen, var nok kor vanskeleg det er å halde fokus på det faglege når ein skal prøve ut slike "gøye" arbeidsformer. Når vi som vaksne studentar ikkje greier det, korleis skal vi då forvente at unge elevar skal greie det utan vidare? Svært nyttig lærdom å ta med seg vidare!

Denne samlinga var varierande, og ikkje minst lærerik. Personleg fekk eg roa nervane litt med tanke på dei mappeoppgåvene eg var litt usikker på, og eg fekk nyttige idéar til vidare arbeid med spesielt M1 og M3. Møtet med Wølner var også positivt, og det var veldig greitt å få ein grundigare gjennomgang i porteføljemetodikken og arbeid med pedagogiske tekstar i digitale mapper.

Andre samling DKL104

Denne samlinga hadde temaet videoproduksjon, eit svært spennande tema for meg personleg.

Fyrste dagen gjekk med til ein teoretisk gjennomgang av ein del filmfaglege ting, noko som sjølvsagt var både nyttig og interessant, sidan vi seinare skulle få lov til å planlegge og produsere våre eigne filmar. Ein ting å ta med seg vidare for førelesarane etter denne økta, må vere at det kan vere greitt å legge inn tid til pauser. 4 timar utan pusterom blir voldsomt, særleg så seint på dag!

Dag to skulle vi lage film i grupper. Planlegginga starta på torsdagen, så fredag morgon var vi klare for å starte innspelinga. Vi hadde gitt oss sjølve ei lita utfordring med å finne 'location', sidan vi hadde lagt opp til at hovudpersonen skulle hoppe over eit gjerde. Ein liten køyretur forbi golfbana var imidlertid alt som skulle til, og eg vil rette ein stor takk til Magnus Vassbotn som lot oss nytte STEINGARDEN (Elena lærte seg eit nytt ord denne dagen) hans. Innspelinga av filmen gjekk smertefritt, mykje takka vere god planlegging på førehand. Redigeringa tok litt lenger tid, og vi rakk ikkje å finne høvande musikk til filmen. Likevel vart resultatet ganske bra, og den ferdige filmen ligg klar til avspeling i eit anna blogginnlegg.

Andre samling DKL102

Denne samlinga hadde temaet Digital Arena. I grove trekk handla vel torsdagen og første del av fredagen om Google Earth og geotagging av bilete, medan fredag ettermiddag var sett av til pedagogisk programvare, Google Sketchup og dataspel i læringsarbeid.

Torsdag fekk vi ei gruppeoppgåve der vi skulle lage eit undervisningsopplegg der elevane skulle bruke Google Earth. Vi skulle så gjere oppgåva og presentere resultata. Vi tok utgangspunkt i eit opplegg der elevane skulle ta bilete frå heimstaden sin, og plassere dei geografisk på eit kart. Dette skulle så lastast opp i Google Earth, der klassen så kunne lage ei slags reise frå plass til plass. Takka vere at Google Earth ikkje fungerte slik det skulle, fekk vi aldri gjort ferdig heile opplegget. Men idéane vi hadde vart presenterte for resten av studentane, med dette bakgrunnsmaterialet.

Eg lærte mykje om Google Earth på denne samlinga, og fekk sjå at det finst eit stort potensiale i dette programmet for bruk i skulen, også utover det som har direkte med kart og geografi å gjere.

Google Sketchup vart eit anna nytt bekjentskap på denne samlinga. Dette er eit enkelt og brukarvennlig 3D-teikneprogram, som dei fleste kan lære seg å bruke. Her fekk vi, etter ei kort opplæring, i oppgåve å teikne vårt eige hus, for deretter å laste det opp til Google Earth. Sjølve teikninga gjekk forsåvidt greitt, men feilen i Google Earth dukka opp på nytt slik at det vart vanskeleg å laste opp teikninga dit.

Heilt til slutt på samlinga skulle vi prøve oss på eit spel der ein skulle bygge vegbruer så kostnadseffektivt som mogleg. Bridge Construction Set var artig nok det, og etterkvart som eg forsto korleis det fungerte, greidde bilane jammen å krysse bruene også!:) Ser absolutt korleis dette kan nyttast i til dømes matematikk!

Filene eg produserte gjennom øktene med geotagging og 3D-teikning, ligg i dette filarkivet.

Ei lærerik og artig samling dette! Alltid kjekt når vi får prøve oss på noko praktisk som vi kan ta med oss vidare ut i skulen.

Gjerde_René_DKL104_A3_v09

Taco på 170 sekunder

Mitt bidrag til Arbeidskravsoppgåve 3:

Arbeid med A1

Gruppa hadde eit nettmøte via Skype, der vi fekk lagt ned ein grunnmur for vidare arbeid med oppgåva. Idéar vart lufta og noko arbeid vart fordelt. Stiller spørsmålsteikn ved om denne samarbeidsmåten er meir effektiv enn skriftleg samarbeid via til dømes chattefunksjonen i Google Dokumenter, sidan det i Skype var svært viktig at kun ein person hadde ordet i gongen. Ikkje alltid like lett å oppfatte kva folk meiner med det dei seier, eller i det heile tatt få med seg det som blir sagt, når kommunikasjonen foregår munnleg, og heller ikkje alltid like lett å forme og formidle eigne idéar når ein skal lytte til andre samtidig. Men dette er sikkert ei vanesak, og det blir nok betre etter kvart!:)
Samarbeidsdokument i Google Dokumenter er også oppretta, noko som har vist seg å vere ein bra mmåte å samarbeide på tidlegare.:)

Første samling DKL104

Denne samlinga gjekk frå 29. til 30. januar, med det spennande temaet Nettradio!

Kva er ein Podcast? Kva kjenneteiknar god radio? Kven er Pamela? Korleis produsere og abonnere på ein Podcast? Alt dette var spørsmål vi ikkje visste vi sat inne med, men like fullt skulle få besvart gjennom denne samlinga.

Ein del tid gjekk med til innspeling og redigering av lyd, altså praktiske arbeidsoppgåver - eit kjenneteikn som går att på dei samlingane eg likar best!:) Dei fleste av oss(?) vart kjende med Skype for fyrste gong på denne samlinga, og ikkje minst Pamela (ikkje så rund i formene som ein skulle tru), eit program for å ta opp samtalar over Skype. Den fyrste oppgåva gjekk på bruk av dette programmet, der vi skulle ta opp ein gruppesamtale rundt temaet medieproduksjon i skulen, som seinare skulle redigerast ved hjelp av ein gammal kjenning - Audacity. Det endelege produktet vart - som alt anna arbeid denne samlinga - ikkje heilt ferdig, men etterkvart vil du nok kunne finne denne lydfila i arbeidsmappa mi.

Neste oppgåve gjekk på at gruppa skulle lage ein podcast som kunne abonnerast på gjennom iTunes. Dette skulle vise seg å bli ein innvikla prosess, der ein fort kunne bite av seg tunga sjølv om ein heldt den aldri så beint i munnen. Vi nytta både blogg og nettstad for å få til ein RSS-feed det skulle gå an å abonnere på, og ved hjelp av Feedburner skulle dette abonnementet også fungere i iTunes. Dette fekk vi aldri heilt til på gruppa vår, men med litt finjustering på diverse innstillingar så skal det vel gå bra til slutt.

Til slutt var det tid for å teste ut dei rådyre lydopptakarane Torbjørn hadde investert i, og desse skulle vi bruke til å lage ei lydforteljing. Vi vart kanskje for ambisiøse i innspelingsfasen, og fekk aldri tid til å redigere fram eit ferdig produkt - her heller. Men også her vil det etterkvart kome ei ferdig fil i arbeidsmappa til dette emnet.

Ei interessant og kanskje litt "nerdete" samling - midt i blinken for oss som likar å styre litt med data. Mykje bra stoff å ta med seg vidare ut i skulen også!:)

Første samling DKL102

Første samling på DKL102 gjekk av stabelen 15. og 16. januar. Tema for samlinga var Sosial Web og Elektroniske Tankekart.

Heimelekse før samlinga var at vi skulle vere medlem av minst tre nettsamfunn. Dette var ei smal sak, sidan eg allereie har testa ut ein del slike, og er aktiv medlem av både Facebook, MSN og Picasa. På samlinga vart det vidare diskusjon rundt slike nettsamfunn, og gruppa vår laga eit felles tankekart om temaet, med vekt på faktorar som samarbeid, deling og dialog/respons. Meir om tankekartet i arbeidsmappa mi.

Gruppearbeidet kombinerte refleksjonen rundt sosial programvare med utprøving og bevisstgjering rundt bruk av elektroniske tankekart. Kjell brukte mykje av samlinga til å uttrykke sin kjærleik til digitale tankekart, og eg trur jammen at propagandaen er i ferd med å funke. Eg ser heilt klart store fordelar med å arbeide på denne måten, og spesielt dersom Mindomo klarer å rette opp funksjonen som tillet fleire brukarar å arbeide i eit tankekart samtidig. Dette fungerer ikkje per i dag, og gruppa måtte difor utnemne ein sekretær (tilfeldigvis den første som logga inn på dokumentet) som kunne skrive ned tankane til gruppa. Arbeidet vart soleis ikkje så effektivt som det kunne ha blitt, og forhåpentlegvis vil bli, gjennom dette verktøyet.

Etter denne samlinga føler eg at eg har gjort meg fleire erfaringar som eg kan få nytte av når eg skal ut i skulen, både når det gjeld eventuell bruk av sosial programvare i skulesamanheng og nytteverdien av elektroniske tankekart. Program for skaping av elektroniske tankekart, som Mindomo og Freemind, kjem eg til å gjere meg nytte av også i mitt eige studie.

Testing testing

Dette er min blogg for DKL102 og DKL104